Жаҳон соғлиқни сақлаш ташкилоти ҳисоботида сўнгги ўн йил ичида биринчи марта сил касаллигидан ўлим ҳолатлари кўпайгани маълум қилинди.

БМТ ахборот хизмати хабар беришича, 2020 йилда касалликлар сони ўтган йилга нисбатан камайган, аммо ўлим сони кескин ошиб кетган. Ушбу ҳолат пандемия ва чекловлар билан боғлиқ экани айтилмоқда. Боиси, одамларда синовдан ўтиш ва тиббий ёрдам олиш имконияти бўлмаган.

ЖССТ маълумотларига кўра, ўтган йил ушбу касалликдан 1,5 миллион киши вафот этган. Бироқ 2021 ва 2022 йилларда бу кўрсаткич анча юқори бўлади.

Хабарингиз бўлса, яқинда Республика ихтисослаштирилган фтизиатрия ва пульмонология илмий-амалий тиббиёт маркази директори Наргиза Парпиева пандемиянинг иккинчи тўлқини ва республикада сил касаллигига оид вазият ҳақида тўхталган эди. Унинг таъкидлашича, охирги 10 йил давомида сил касаллигининг 100 000 аҳолига нисбатан касалланиш кўрсаткичи бир меъёрда камайиб бормоқда. Бу ҳолат – президент қарорлари билан тасдиқланган дастурларнинг тўлақонли бажарилиши, ЖССТ ва бошқа халқаро ташкилотлар билан ҳамкорликда сил касаллигининг олдини олиш, ташхислаш ва даволаш борасидаги замонавий, замон талабига жавоб берадиган янги усулларни ишлаб чиқиш ва амалиётга татбиқ этиш натижасидир. Айниқса, сил касаллигининг енгил турлари, сил микобактериясини ажратмайдиган тури билан касалланган беморлар амбулатор даволашга ўтказилиши натижасида фтизиатрия тизимидаги ташкиллаштирилган ўринлар босқичма-босқич қисқартирилмоқда.

2020 йил давомида илк маротаба сил касаллиги аниқланган беморлар 100 000 аҳолига нисбатан касалланиш кўрсаткичи 32,1 нафарни ташкил қилган ва 2019 йилга нисбатан 5,0 нафарга камайган. Бу ҳолат бир томондан, 2020 йил давомида амалга оширилган карантин ва ниқоб тақиш тизими жорий қилиниши натижаси бўлса, иккинчи томондан, фтизиатрия тизимидаги муассасаларга беморлар мурожаатлари сонининг кескин камайишидир.

Мавзуга оид:

Сурат: «mbudotsdyut«

Дўстларга улашинг: